أدرس مشورة أونلاين

الدراسة في معهد القديس بولس للتوعية المشورية فرقت معايا في وعيي بذاتي والنمو الروحي والنفسي . كنت محاطة بعائلة وليس مجرد خدام. ناس حلوة وداعمين.

أنا كنت في فصل المشورة السنة اللي فاتت وبصراحة كان في موضوعات كتيرة أخدناها كانت مفيدة خالص لينا ، مش بس إفادة من ناحية المعلومات على قد ما في إفادة شخصية... ليه شخصيتي كدة وليه بتصرف كدة وإيه الحيل الدفاعية اللي الإنسان بيستخدمها وإزاي نغفر. فصل المشورة حلو خالص ومفيد لأي حد يشترك فيه وموضوعاته والمتكلمين حلوين جدا. ربنا يبارك في الخدمة والثمر بتاعها ويكون معاكم دايمًا.

الدراسة في معهد القديس بولس للتوعية المشورية خلتني أعرف نفسي أكتر وأحاول أشتغل عليها وأعرف أتعامل وأتفاهم مع الناس وأعرف أتعامل مع الأطفال وأفهم دماغهم في مراحل عمرية مختلفة.

كورس المشورة أخدته وأنا مكرسة على سنتين دفعة 2012 وقد ايه فرق معايا على مستوى علاقتي الشخصية بالله والوعي والفهم الروحي العميق في معرفتي بيسوع وفرق أكتر وأكتر في تعاملاتي مع إخواتي وكل الآخرين وبالأكثر خدمتي ، حيث أني أخدم بنات طالبات جامعية وبشجع كل بناتي انهم ميترددوش لحظة إنهم يدخلوا السنة دي قد إيه هتفرق وتنور ليهم سكتهم.

ممتنة جدا جدا لكل وقت عدى عليا في المشورة، للأمانة أنا كنت ظالمة نفسي جوة مفاهيم كتيرة جدا غلط في الحياة، فعن تجربة بشجعكم للمشورة علشان هتغير في حياتكم كتير وفي تعاملاتكم وأسلوب حياتكم.

كورس جميل ومفيد ،وأول سلمة للتغيير . أشجع كل حد يشترك فيه . مفيد لكل جوانب الحياة والناس اللي بنتعامل معاهم ناس مبهجين ومليانين بروح ربنا. ربنا يستخدمهم دايمًا لمجد إسمه. خريجة فصل القديس بولس للتوعية المشورية ...أنا مبسوطة بالتكريم دة شكرًا لكل حد اتعاملت معاه وشكرًا للأنبا يؤانس على دعمه لهذا الكورس .

الكورس فوق الرائع، أنا شخصيًا كنت أول مرة أكون قدام كلام هو فعلا بيوصف حاجات كتير جوايا، ودة فرق في حياتي وعلاقاتي وخدمتي جدا لغاية دلوقتي. فشكرُا لكل من له تعب...

"وأما من عمل وعلم فهذا يدعى عظيمًا في ملكوت السماوات." (مت 5 : 19) فرق معايا جدًا أفهم وأتعلم أفكار وتعاليم مسيحنا وكنيستنا الأرثوذكسية عن النفس الإنسانية ومدى إهتمام مسيحنا بالروح والنفس والجسد التلاتة مش حاجة على حساب التانية وإزاي أكرم جسدي وأساعد نفسي وأرتقي بروحي. حقيقي مش ندمانة على الخطوة دي ومستعدة أعملها تاني وتالت وعاشر ...بشجع جدااااا اللى حابب ينضم هتكون أجمل خطوة تعملها ،بس لو إنت بس فاتح قلبك للمسيح وعقلك يستقبل النور هتعيش الآية اللي بتقول "تغيروا عن شكلكم بتجديد أذهانكم".

أحلى حاجة ممكن تقدمها لنفسك إنك تساعدها إنها تتخطى أى حاجة حصلت في الماضى وإنك تساعدها إنها تعرف طريق للتعافى و النمو ومعرفة يسوع بشكل أعمق وأحلى بكتير جداً من ا للى تعرفه من زمان المشورة بتساعدك إنك تتصالح مع نفسك وتقبلها وتحبها وتمشى في طريق جديد للتعافى و الشفاء والنمو .... طريق جديد لمعرفة يسوع الحلو .

"ولا تشاكلوا هذا الدهر بل تغيروا عن شكلكم بتجديد أذهانكم، لتختبروا ما هي إرادة الله: الصالحة المرضية الكاملة." (رو 12 : 2) "أيها الحبيب في كل شئ أروم أن تكون ناجحًا وصحيحًا، كما أن نفسك ناجحة" (3يو 1 : 2) حفلة تخرج الدفعة الثانية عشر من فصل القديس بولس الرسول خطوة حلوة في النمو ومعرفة ربنا. شكرًا لربنا إنه سمح ليا أخد الخطوة دي وأدخل معهد المشورة. حقيقي المحاضرات والمحاضرين فرقوا جدًا وتأثيرهم موجود ومكمل معانا. بطلب من ربنا يكمل اللي بدأه معايا ويمشي معايا الرحلة، أرجوك كمل شغلك فينا وأواني كرامة خلينا. أتمنى كل الناس تشترك وتشوف وتسمع وتفرح بكل الحلو اللي في المعهد. ربنا يبارك كل الخدام وكل من له تعب في هذا المكان.

اللى فرق معايا في مؤتمر النمو محاضرة القيمة ،أنا كان عندي مشكلة في الموضوع دة وكنت باخد قيمتى من حاجات كنت فاكرها مهمة، لكن بعد المحاضرة دي وبعد جملة "قيمتك إنك ابن الله" ودي كانت كفاية تهد كل فكرة كانت مشوهة عندي ...كمان محاضرة الله الآب أنا دايمًا كنت ومازلت بقول لربنا كلمة "بابا" وكنت ومازلت حاسس كدة ، وكنت متردد أحيانًا إنما بعد المحاضرة دي لا ،الموضوع بقى ثابت وحسيت إن الطريق اللي أنا كنت ماشي فيه فعلا صحيح.